Center dal Parc Naziunal
Zernez vala sco porta per il Parc Naziunal. Qua sa chattan l’administraziun dal Parc Naziunal en il Chastè Planta-Wildenberg, l‘ Auditori dal Chastè gist daspera sco er il Center dal Parc Naziunal da la vart opposta da la via.
Avant ina spassegiada tras il territori da protecziun recumandain nus da sa fermar en il Center dal Parc Naziunal. L’exposiziun Natira sulvadia en il center lascha emprender ad enconuscher bain la natira dal parc. L’exposiziun speziala che mida mintg’onn envida da scuvrir.
Nossas collavuraturas a l’infoteca As gidan a moda persunala e cumpetenta da planisar Vossa tura en il Parc Naziunal Svizzer. A quella infoteca As stattan a medem temp a disposiziun era tut ils servetschs d’infurmaziun da la Zernez Tourist Information. Cordial bainvegni!
Viandar e scuvrir
Il Parc Naziunal Svizzer cun sias 100 km sendas da viandar e cun 21 rutas uffizialas è in paradis absolut per viandar ed observar animals.
As famigliarisai per plaschair avant Vossa spassegiada cun nossas prescripziuns davart la protecziun da la natira e cun il stadi da las sendas da viandar. Bleras spassegiadas cuntegnan pli grondas differenzas d’autezza e mainan fin sur il cunfin dal guaud. La rait mobila na cuvra betg tut l’intschess dal parc. Ina midada andetga da l’aura u crudadas da temperatura pretendan ina buna preparaziun ed equipament. Per sutgas cun rodas u charrotschas d’uffants n’èn nossas sendas da viandar betg adattadas.
As laschai accumpagnar d’in da noss guids cumpetents tras il Parc Naziunal o prendai a fit per Vossas observaziuns in spievel da champagna aint il Center dal Parc Naziunal a Zernez. Cun l’app dal Parc Naziunal vais Vus da la partida las infuormaziuns las plü importantas er offline.
Alloschi e viadi
Cun ils meds da transport publics o cun seis auto as po arrivar sainza problems il Parc Naziunal. En il senn da la protecziun da la natira As recumandain da far diever da tren e bus. Qua tras resultan er spassegiadas interessantas cun divers puncts da partenza e puncts finals.
Pernottar entaifer il Parc Naziunal è pussaivel en la Chamanna Cluozza o en l’Hotel il Fuorn sper la via dal Pass dal Fuorn. Ordaifer il Parc Naziunal existan pussaivladads da pernottar in tut las classas da pretsch.
Purschidas per uffants e per famiglias
Nossa purschida concepida aposta per famiglias ed uffants tanscha dad excursiuns spezialas sur sendas d’exploraziun fin ad exposiziuns. Dapli infurmaziuns chattais Vus sut il link respectiv.
Purschidas per scolas
Ils uffants, ils creschids da damaun, dovran la natira per pudair emprender a viver e d’agir cun responsabladad.
La pedagogia da la natira è in’incumbensa impurtanta da mintga parc naziunal. Il contact ch’ils uffants han gia da pitschen cun la natira è decisiv per lur chapientscha da la natira da pli tard. Sper las purschidas da l’educaziun ambientala averta per tut las visitadras ed ils visitaders, avain nus era differentas offertas che sa drizzan explicitamain a scolas. Dapli infurmaziuns chattais Vus sut il link respectiv.
Museum Schmelzra
Illa Val S-charl è vegnì explotà durant passa 300 ons mineral d’argient e da plum. Il museum Schmelzra a S-charl muossa l’istorgia da las minieras da maniera impressiunanta. Era visitas guidadas en las galarias sun pussaivlas. Sin il plaun sura preschenta il Parc Naziunal sia exposiziun d’urs. Sper la Schmelzra sa chatta la senda d’aventira Senda da l’urs.
Infomobil
La stad ha il Parc Naziunal in infomobil per dar pled e fatg als giasts.
L’infomobil porscha ina massa pussaivladads d’infurmaziun e promova contacts al lieu tranter ils collavuraturs dal Parc ed ils giasts. Ina persuna stat a disposiziun per dumondas pertutgant il Parc Naziunal, plinavant survegnis Vus là material d’infurmaziun sco prospects, chartas e guids da viandar. In relief detaglià da l’entir territori dal Parc Naziunal gida ad As orientar en la cuntrada muntagnarda.
L’infomobil è plazzà per il solit sper l’hotel Parc Naziunal Il Fuorn sper la via dal Pass dal Fuorn u a l’entrada da la Val Trupchun a S-chanf.