Reservat da biosfera da l'UNESCO
Dapi il 1979 è il PNS er in reservat da Biosfera da l’UNESCO.
Ensemen cun la Val Müstair e cun la vischnanca da Scuol furma il Parc Naziunal Svizzer dapi l’onn 2017 uffizialmain il Reservat da biosfera da l’UNESCO Biosfera Engiadina Müstair. En quel furma il Parc Naziunal existent la zona centrala. L‘ idea fundamentala dal reservat da biosfera è d’ir enturn in moda persistent cun la natira. Sco regiun da model duain reservats da biosfera mussar ch’ina cultivaziun persistenta vala la paina.
Las destinaziuns turisticas
Il Parc Naziunal Svizzer s’extenda sur ils territoris da duas destinaziuns turisticas:
La Turissem Engiadina Scuol Samignun Val Müstair SA, curt TESSVM, è l’organisaziun turistica regiunala da l’Engiadina Bassa, cun las trais regiuns da vacanzas Engiadina Scuol Zernez, Samignun e Val Müstair.
L’Engiadina Turissem SA è l’organisaziun turistica regiunala da l’Engiadin’ota, da S-chanf fin Malögia.
La destinaziun Engiadina Bassa maina l’infurmaziun turistica per giasts en il Center dal Parc Naziunal a Zernez. Grazia a questa collavuraziun è il Center avert l’entir onn.
Ils parcs grischuns
En il Grischun datti sper il Parc Naziunal Svizzer quatter parcs natirals regiunals, in patrimoni natiral mundial da l’UNESCO ed in reservat da biosfera da l’UNESCO. Las diversas categorias da parcs sa distinguan tras lur finamiras ed incumbensas differentas.
Ils parcs grischuns sa distinguan tras cuntradas preziusas, ina ritga biodiversitad ed ina cultura multifara. Els èn in garant per la qualitad dals products agriculs ed artisanals, per experientschas vardaivlas ed in’auta qualitad da viver. Las activitads dals parcs grischuns s’orienteschan tenor ils princips da la persistenza e promovan in svilup economic e social en accord cun la natira. Els èn vegnids creads per iniziativa da la populaziun locala.
Rait dals parcs svizzers
Dals 1600 reservats en Svizra è il Parc Naziunal en l’Engiadina quel ch’è protegì il meglier. Qua vegn la natira surlaschada cumplettamain a sasezza.
Sin plaun internaziunal è la Svizra disfavurisada cun in sulet parc naziunal – malgrà sia rolla da piuniera cun l’emprim parc naziunal dal l’Europa Centrala. Ils ultims onns hai dà moviment en la cuntrada da parcs da la Svizra. L’Uffizi federal d’ambient sustegna a basa da la lescha davart la protecziun da la natira e da la patria la creaziun da novs territoris da protecziun da gronda dimensiun.
Rait dals territoris alpins da protecziun ALPARC
En tut las Alps dumbrain nus 14 parcs naziunals e numerus auters territoris da protecziun. ALPARC, la rait d‘ territoris alpins da protecziun, è in’applicaziun directa da la Convenziun da las Alps. Ella ha la finamira da promover il barat da savida, experientschas e metodas tranter ils administraturs dals parcs alpins. Il Parc Naziunal Svizzer s’engascha dapi il 1996 en divers projects da ALPARC.
ALPARC è activ en trais champs tematics: biodiversitad e colliaziun ecologica, svilup regiunal e qualitad da viver sco er furmaziun per in svilup persistent en las Alps.
