Nossas finamiras
Ina regiun da model per in svilup persistent
En la Biosfera da l’UNESCO Engiadina Val Müstair duain vegnir resguardads da medema maniera ils interess da la natira e da l’uman. Ella ha fixà la suandanta finamira:
Nus dain vinavant a la proxima generaziun la natira e la cultura sco chapital e sco spazi da viver attractiv.
Il cussegl da reservat da Biosfera furma il gremi strategic da l’UNESCO Biosfera Engiadina Val Müstair. Las 3 partidas èn represchentadas cun mintgamai 2 commembras e commembers en moda paritetica:
Parc Naziunal Svizzer:
Heidi Hanselmann, presidenta da la Cumissiun federala dal Parc naziunal CFPN
Gianna Rauch-Poo, commembra da la cumissiun federala dal parc naziunal CFPN
Vischnanca da Val Müstair:
Thomas Brülisauer, president da la cumissiun strategica Parc natiral regiunal Biosfera Val Müstair
Gabriella Binkert Becchetti, presidenta communala Val Müstair
Vischnanca da Scuol:
Fadri Blanke, suprastant communal da Scuol
Daniel Stecher, suprastant vischnanca da Scuol
Il secretariat dal reservat da biosfera sa chatta tar la vischnanca da Scuol. Dapi il 2017 maina Angelika Abderhalden la gestiun.
Las activitads da la UNESCO biosfera Engiadina Val Müstair sa drizzan tenor las finamiras ed ils projects menziunads en il plan da manaschament.
En la suandanta charta da survista vegn reproducì il territori da la Biosfera Engiadina Val Müstair cun las trais zonas centralas, zona da tgira e da svilup da l’UNESCO, cun la surfatscha da 449 km2.
En la Biosfera da l’UNESCO Engiadina Val Müstair èn las zonas repartidas sco suonda (cifras en ha, arrundadas):
- Zona centrala (Parc Naziunal Svizzer): vischnancas da S-chanf (2’306), Zernez (11’622), Val Müstair (829), Scuol (2’276)
- Zona da tgira Engiadina Val Müstair: Val Müstair (8’634), Scuol (8’739)
- Zona da svilup Engiadina Val Müstair: Val Müstair (10’400), Scuol (51)
UNESCO Biosfera Engiadina Val Müstair
Post d’administraziun
Chasa cumünala, Bagnera 170
CH-7550 Scuol
Tel. +41 79 670 26 23
E-Mail: a.abderhalden(at)biosphaerenreservat.ch
www.biosphaerenreservat.ch
Educaziun ambientala
Nossa finamira è che persunas interessadas, uffants e giuvenils u scolaras e scolars possian viver ed observar activamain la natira.
- Purschidas per persunas creschidas (sut occurrenzas, per tudestg)
- Purschidas da la furmaziun ecologica per classas da scola (ulteriuras pussaivladads sin dumonda)
- Organisaziun d’engaschaments per voluntaras e per voluntaris (persunas singulas, gruppas, classas da scola)
L’organisaziun da las purschidas succeda en collavuraziun cun la Fundaziun Pro Terra Engiadina. En il perimeter da la Val Müstair pudais Vus as drizzar al parc da natüra regiunal Biosfera Val Müstair.
Visiuns per l’avegnir
L’utilisaziun persistenta da la natira en reservats da biosfera duai mussar ch’ina cultivaziun persistenta vala la paina. La regiun Engiadina Val Müstair è adattada idealmain sco reservat da biosfera. La cuntrada da cultura ha grondas qualitads da la natira e da la cuntrada che vegnan mantegnidas e promovidas grazia ad in’utilisaziun persistenta. Cun il label da l’UNESCO pon vegnir accentuadas questas qualitads en il marketing turistic – ina schanza unica che l’organisaziun turistica Engiadina Scuol Samignun Val Müstair (TESSVM) ha renconuschì. Ussa vali da cuntinuar cuminaivlamain questa via empermettenta e da dar uschia a la regiun in cler avantatg per la concurrenza.